TRO SA KORTE, GI-RESPETARAN

Gi-respetaran ni Acting Mayor Rudy C. Marzo ang nadawat kagahapon nga temporary restraining order (TRO) gikan sa sala ni Judge Arthur L. Abundiente sa Regional Trial Court – Branch 4, ning dakbayan sa Iligan.

Apan mideklarar si Marzo nga mokanaug siya sa puwesto isip acting mayor aron mobalik sa pagka-bise mayor kung mo-abot na ang ‘implementation order’ gikan sa Department of Interior and Local Government (DILG), kung aduna man, tungod kay ang nasangpit nga ahensiya man ang mopatuman niini ug dili ang sheriff.

Isip pagpakita og respeto sa maong TRO, mipahibalo si Marzo nga gisuspende una niya ang pagpamirma sa mga opisyal nga dokumento nga nagkinahanglan og pirma sa lokal nga hepe ehekutibo.

Sa pagkakaron, gi-awhag niini ang mga regular nga kawani sa kagamhanang lokal sa pagpadayon sa ilang naandang gimbuhaton sa city hall ug padayong mo-atiman sa mga kliyente nga nagkinahanglan sa serbisyo.

Alas 8:45 ganinang buntag gi-file sa mga abogado ni Marzo ang Motion for Reconsideration ngadto sa sala ni Abundiente samtang aduna na usa’y gi-file nga Petition for Certiorari ngadto sa Korte Suprema.

Angay’ng kahibaloan nga kauban ni Mayor Celso G. Regencia ang unom ka mga abogado ug usa ka pari ang nangayo og Declaratory Relief, Injunction, Preliminary Injunction, Temporary Restraining Order and Damages ug Mandamus gikan sa korte aron ipahunong sa pag-function sila ni Marzo ug 1st Councilor Providencio A. Abragan, Jr. isip acting mayor ug acting vice mayor.* (CIO-Iligan/December 8, Tuesday)

Leave a Reply

Your email address will not be published. Required fields are marked *